Nod Llwyddo’n Lleol 2050 yw dangos bod cyfleoedd cyffrous a dyfodol disglair ar gael yng Ngwynedd ac Ynys Môn
Gydag allfudo teuluoedd a phobl ifanc yn cael ei gydnabod fel un o’r prif resymau am ddirywiad yn nifer y siaradwyr Cymraeg yn y cadarnleoedd, nod Llwyddo’n Lleol 2050 yw darbwyllo pobl ifanc a theuluoedd ifanc sydd mewn peryg o adael neu sydd eisoes wedi ymadael bod modd cael dyfodol disglair, gyda swydd dda o fewn maes cyffrous, yn eu cymuned gynhenid.
Gweinyddir y rhaglen bresennol ar draws Gwynedd ac Ynys Môn gan Menter Môn, menter gymunedol nid-er-elw sy’n gwireddu cynlluniau amrywiol i ddatgloi potensial ein pobl a’n hadnoddau er mwyn sicrhau dyfodol i’n cymunedau.
Ariennir y cynllun gan y Gwasanaeth Adfer Niwclear (NRS) ar ran yr Awdurdod Datgomisiynu Niwclear (NDA) a derbynnir cefnogaeth gan Gyngor Sir Ynys Môn, Cyngor Gwynedd a Rhaglen ARFOR sy’n edrych i ddefnyddio mentergarwch a datblygu’r economi i gefnogi cadarnleoedd y Gymraeg, a thrwy hynny, cynnal yr iaith.